2027 අයවැයෙන් අප අපේක්ෂා කරන්නේ මෙතෙක් අත්පත් කරගත් ආර්ථික ස්ථාවරත්වය මත පදනම්ව නිෂ්පාදනය ඉහළ නැංවීම, ආර්ථික ජයග්‍රහණ ජනතාවට සාධාරණව බෙදී යාම සහ නව ආර්ථික පරිවර්තනයක් ඇති කිරීමයි.” පුද්ගල ආදායම් බදු නිදහස් සීමාව ඉහළ නැංවීම, අත්‍යවශ්‍ය ආහාර හා පොත්පත් බදු වලින් නිදහස් කිරීම, රාජ්‍ය සේවක දීමනා ඉහළ දැමීම සහ ඩිජිටල් හා ප්‍රවාහන ක්ෂේත්‍රයේ දැවැන්ත ආයෝජන රැසක් සමඟින් 2027 අයවැය අද (12) පාර්ලිමේන්තුවට ඉදිරිපත් විය.
2027 අයවැය: ආර්ථික ස්ථාවරත්වයේ සිට පරිවර්තනීය යුගයක් කරා
2027 වර්ෂය සඳහා වන ශ්‍රී ලංකාවේ 81 වන අයවැය කථාව මුදල්, ක්‍රමසම්පාදන සහ ආර්ථික සංවර්ධන අමාත්‍ය අනුර කුමාර දිසානායක මහතා විසින් 2026 නොවැම්බර් 12 වන දින පාර්ලිමේන්තුවට ඉදිරිපත් කරනු ලැබීය. දරුණු ආර්ථික අවපාතයෙන් මිදී ගොඩනඟා ගත් සාර්ව ආර්ථික ස්ථාවරත්වය පදනම් කරගනිමින්, නිෂ්පාදන ආර්ථිකයක්, ඩිජිටල් පරිවර්තනයක් සහ සමාජ සාධාරණත්වය තහවුරු කරන නව පරිවර්තනීය යුගයක් කරා රට මෙහෙයවීම මෙවර අයවැයේ මූලික අරමුණයි.
- බදු සහන සහ ජීවන වියදම් අඩු කිරීම:
- මාසික පුද්ගල ආදායම් බදු නිදහස් සීමාව රු. 150,000 සිට රු. 162,500 දක්වා ඉහළ නංවා ඇති අතර බදු ස්ථර පුළුල් කිරීම මඟින් බදු ගෙවන්නන්ට අමතර මාසික සහනයක් ලබා දී ඇත.
- අත්‍යවශ්‍ය ආහාර ද්‍රව්‍ය මිල පහත හෙළීම සඳහා හාල්මැස්සන්, උම්බලකඩ සහ වියළි මිරිස් මත පනවා තිබූ විශේෂ වෙළෙඳ භාණ්ඩ බද්ද 2026 නොවැම්බර් 13 සිට සැලකිය යුතු ලෙස අඩු කෙරේ.
- අධ්‍යාපනයට සහනයක් ලෙස පෙළපොත්, අභ්‍යාස පොත් ඇතුළු සියලුම මුද්‍රිත පොත්පත් වැට් (VAT) බද්දෙන් සම්පූර්ණයෙන්ම නිදහස් කර ඇත.
- රාජ්‍ය සේවක වැටුප්, දීමනා සහ විශ්‍රාමික සහන:
- රාජ්‍ය අංශයේ මූලික වැටුප් වැඩි කිරීමේ අවසන් අදියර 2027 දී ක්‍රියාත්මක කිරීම සඳහා රු. බිලියන 110ක් වෙන් කර ඇත.
- වෛද්‍ය, හෙද ඇතුළු සෞඛ්‍ය කාර්ය මණ්ඩල, විශ්ව විද්‍යාල ආචාර්යවරුන්, අධිකරණ නිලධාරීන්, පොලිස්, ත්‍රිවිධ හමුදා, බන්ධනාගාර සහ ග්‍රාම නිලධාරීන් ඇතුළු ක්ෂේත්‍ර නිලධාරීන්ගේ දීමනා ඉහළ නංවා තිබේ.
- 2020–2024 කාලයේ විශ්‍රාම ගිය රාජ්‍ය සේවකයන්ට 2027 ජූලි සිට මාසිකව රු. 2,500ක අතුරු දීමනාවක් හිමිවේ.
- සමාජ ආරක්ෂණය, අධ්‍යාපනය සහ සෞඛ්‍යය:
- අස්වැසුම ඇතුළු සමාජ ආරක්ෂණ දීමනා සඳහා රු. බිලියන 230ක් වෙන් කර ඇති අතර, වකුගඩු රෝගීන්ගේ සහ ආබාධ සහිත පුද්ගලයන්ගේ මාසික දීමනාව රු. 12,500 දක්වා වැඩි කෙරේ.
- ගුරු විද්‍යාපීඨ ශික්ෂණලාභීන්ගේ මාසික දීමනාව රු. 20,000 දක්වා ඉහළ නංවා ඇති අතර පාසල් අධ්‍යාපනයේ ඩිජිටල් පරිවර්තනයට විශාල ප්‍රතිපාදන වෙන් කර තිබේ.
- මහජන සෞඛ්‍ය සේවාව වෙනුවෙන් ප්‍රාග්ධන වියදම් රු. බිලියන 131ක් වෙන් කර ඇති අතර, 1990 සුවසැරියට නව ගිලන් රථ 100ක් එක් කිරීමටත්, “ආරෝග්‍යා සුවතා මධ්‍යස්ථාන” 1,000ක් ඉදිකිරීමටත් යෝජිතය.
- ඩිජිටල් පරිවර්තනය සහ යටිතල පහසුකම්:
- ජාතික කෘත්‍රිම බුද්ධි මධ්‍යස්ථානයක් (National AI Centre) පිහිටුවීම, LGC 3.0 ව්‍යාප්තිය සහ පාසල් සිසුන් 750,000කට බ්‍රෝඩ්බෑන්ඩ් වවුචර්පත් ලබාදීම ඇතුළු ඩිජිටල් ආර්ථික කටයුතු වෙනුවෙන් රු. මිලියන 28,500ක් වෙන් කර ඇත.
- මධ්‍යම සහ රුවන්පුර අධිවේගී මාර්ග ඉදිකිරීම් කඩිනම් කිරීමටත්, කැලණිවැලි, ප්‍රධාන සහ වෙරළබඩ දුම්රිය මාර්ග විද්‍යුත්කරණයේ පළමු අදියර ආරම්භ කිරීමටත් රු. මිලියන 80,000ක් වෙන් කර තිබේ.
- සුළු හා මධ්‍ය පරිමාණ ව්‍යවසායකයන් වෙනුවෙන් 3% – 5% වැනි සහන පොලී අනුපාත යටතේ රු. බිලියන 174ක ණය පහසුකම් සැපයීමටත්, වී ගොවීන්ට හෙක්ටයාරයකට රු. 30,000ක පොහොර සහනාධාරයක් ලබාදීමටත් පියවර ගෙන ඇත.